Hnung lam ah i thawm hria in ka lo hawi let a,engmah hmuh tur i awm si lo.
ka ngai hle che a ni tih ka hrechhuak a…

Tawnmang mawlah lamkawiah i lo liam a, hmuh zui tur i awm si lo. Hai ang thang mah i,i zun zam hian kian zai min rel san si lo….

Phu loh di neih nawm zia min zirtir in i tang nem ah min pawn thin mahla, tinge di then lunglen tawrh dan min zirtir loh….???

Ka ngai che asin, mahse i liam si maw! Ka ko che a, mi chhawn si lo. A ni tak e i zal ta si, piallei karah. Mangtha mai le..

TICHUAN MAW….

Hnunglam leh sir tiang ah hraiduh leng ten, laichhuat an chhir an chiar nghian e, chun tang bel in hlim zai an rel…

Tawnmang ramah lenlai chenin, chhungkim te in laitual kan leng ka thai te nen, i duhthusam ang chuan ka hlim ta e…

Ka tawng asin kum riat hnu ah, i zalna mualan, luaithli a nul a chinlai ngaiin. Ka thlir, ka hnem thiam si lo. Tuna ka thai chang ta hi…

Zantiang a lo rei a chhipsam a rim e! Thai-hniangi lunglai dam thei ta lo chu! an zai rel e “NINAWM FB RENG MAI” ti in. hihoha…

THUHMAHRUAI:
Tunge KL Chama chu? Tunge a  nih? Enge a tih thin? Khawnge a awm? A chanchin tlem ziah ka dil a, a ma phalna thlap in a chanchin a then a zar chauh kan ziak a ang e. Sermon ki takin kan thupui hmasa lam a ‘Min Vengtu chu Gurung-a a ni si a’ tih a mi Gurung-a nen a thawk dun, post khat a awm an ni. Ama sawi dan tak ah chuan a hming pum ah hian Emmanuel a tel niin a sawi a. Amaherawhchu, a service book, an chhungkaw ration card vel kan hmuh ve phakah cuan Emmanuel hi a tello, zeldin thu bawl takah helai post a rawn thlen hnu ah chauh Emmanuel hi chu a neih belh a nih a rinawm.

A TIRIN:
Kan hmuh tirh phat chuan pa chawrche leh zakzum, a saptawng takin ‘innocent’ hmel tak a ni a, tawngkam an chhakchhak chiah mai chu(h), ngaihsan tur nge ngaihdam tur tih hriat harsa khawpin a tawng hre pha te rilru ngaihtuahna a tibuai lawi si a ni. A hmel en mai chuan a kum zat tur hi rinthiam a har hle a, kum 25 atanga kum 35 inkar mi ni ngei chuan a lang (teh duai chuan, a karah kum 10 ngawt an tlak chu le, a kum zat hi rinthiam har miau hek le!). Amah hi mi special, mi vang tak leh hlu tak mai, mi nuai khat mai nilo mi nuai sawm zingah pakhat pawh an awm dawn em ni? tih ang vel khawp a mi hlu chung chuang a ni a. Mi tawngkam takin a hmel hrim hrim pawh hi special item pakhat a tlin ve hrim hrim bakah a ven a te thlatin hlawh atang in amah hi a sawm a pakhat pek tlak a ni ve hrim hrim a ni.

Amaherawhchu amah hi mi tawng tuitam thei deuh leh tlawmngai thei tak, engmah thawh hreh neilo mi a ni. A chengah man fuh laklawh tawh chuan duh duh bakah duhloh thlengin ‘Bula tu rawh’ ti a tu mai chi a ni ve a. Tih fuh loh laklawh chuan arsa kan ro a saum telh ang tlat a lem sak hi a ni ve roh a. A phur chang chuan tihtur awmlo pui te hi “..a ngai em? …a ngai em?” ngeiawm khawp in a ti zut zut roh a. A mood off tum chuan ka kawng a na, chuti khati ‘dezei…dezei..’ zuk ti tlat zel a. Tumkhat pawh bag khai tir ka tum ngawt a, a zan tehreng nen a mahin a zo tlat lova. A chhuk a, an vawk talh 1qtl leh 25kg a rit a rawn pawm leh vu vu si.

A TAWNGKAM HMASA :
A rawn awm tirhin tumkhat chu kan ding dun a, kan ti ti dun alawm le, chutih lai chuan kawmchhak lam building atangin nula a rawn dak vang a, chhelo a ti ni ngei tur a ni. Ka tawng ve emaw ka sawi ve emaw ngai hauh lovin aman challenge a siam ta zung zung mai a, “Khi nu chu a va chhelo ve, ngai reng rawh ka la mutpui dawn chiang khawp mai” an ti tawl mai a

“Chama, ngawt ngawt zel a che, kha ti’n an tawng mai mai ngailo”

“E! Min la hrechiang lo mai mai a nih kha, hmeichhe lam te chu kan zei ve na zawng tak a lawm le, Hmeichhia leh uite a chul nel peih peih an tih kha, lo chhinchhiah reng rawh, thla thum chhung a ka mutpui loh a a tak ah”

Hei kum thuma ral ta a, sawi kher a a ngai lo, chhuanlam siam lamah chuan tu tluk rual a nilo.

Tumkhat leh pawh nula pakhat in a mobile-ah a rawn call. Kan hnathawhna lam a kan pu ber bulah dingin ring leng lawngin, “Bawihte ka hmangaihna che hi i ringhlel phal dawn em ni? I tan chuan engkim ka huam a sin!” a ti vei zuap zuap a. Ka’n pu thinin a tuar ta lo, ”Chama, kam chhe tleuh nan tak helaiah rawn ding suh, sawtah pawn ah i duh leh dawt chu va sawi rawh” an ti mai chu(h) a hmun a awm ve lo chu in nuih a za kher lo thei, a hmunah awm ula chuan maw……

He a biak, a bialnu chanchin hi min hrilh suap suap a, a chhass chu nula fel, hmeltha, zei leh piannalh, Secretariat-ah an Pi ber a ni a. Phai ah training in a kal a. September-ah a rawn haw dawn a, palai tir nghal tur a hmeichhiain a nawr nasat viau thu te chu a nilai zan thupui sawi nghek mai a. Hei hun a liam zel a, September ringawt pawh vawi thum a ral ta, a kum a lo sawi tello a ni.

A PI A THI : “Ka pi a thi” tiin nikhat chu a duty hun lo ah a rawn ar nghal luh hlawl mai a, kan thawhpui pa awihlo lutuk in “Chama, dawt sawi sawi suh, mahni pi te an thih tir ringawt ngailo”a lo tia. A ni lah chu an lungchhe nghal deuh ngawt a. Vanduaina avang a a hnathawhna atang a chawlh han lak ngawt a inthlahrun thu te, loh theihloh avang a chawlh a ngaih thu te chu a rawn Speaker da tawh lam Pathian thu sawi suam suam a. Tap deuh par in Pu te pawisa puk a dil a, a khawngaihthlak hlu hlu sia, pawisa te an lo pai ang nawk nawk a, ralna tur te nen. A han reh vang vang a, fuke kimin a rawn haw leh hlawl mai a, nui tha chungin, “A lo la thi lo leh deuh alawm le..heheh…” a a rawn ti hem mai a. A hnu lawk ah chuan kan hriatpui thlapin zualko a rawn thleng leh, chumi tum chuan a dawt sawi palh a hlau ve tawh ngang ani ang e. “A thih leh tak tak leh loh vaih chuan a ho ngawt ang” zuk ti pek a.

NUNTAM  A NEI :
Amah hi a insawi dan takah engkim mai hi a thiam in a hre zul a. Pathian thu te hi a hre fu roh a. A tuiril lam lah hi a lem thei fu tho sia. Revival Team-ah Deputy Speaker ni chung a rawng a lo bawl tawhna te hi a thlasik mau puah phawng phawng zel a. An sawi tak tak mai phei hi chu a sermon atanga piangthar an tam tawh zia te, vanram kawt chhuah ah pawh a tan chuan inthlahrunna tur engmah a awm tawh loh zia te hi min nau sawngnawi bawnghnute tulh nghek zel mai a. A ni a nia, ka’n tha lem sak ve mai mai thin. A’n sawi dan chuan tumkhat chu Pathian rawngbawl a a fehchhuah na ah Thiani nen an intawng fuh a, counseling class te neih pui a, a lu chung a kut nghat a tawngtai kha a lang tlat si a. An bei tak tak mai chu, Kalvari Tlang lawn thlen pui zo ta lovin Sodom leh Gomora lamah a chhuk pui ta zawk niawmin an sawi. A rawn awm hnu Christmas urlawk zanin ‘a hun alawm le’ tiin lu lam leh mawng lam hre map lovin a zurui chu a chatthla a, a tuka  a pentawng han harh chuan TV a Lalruotmawi’n ‘Eden parmawi chul hnu’  a sak an hriat meuh chuan taksa chet na zuk chang chhunzawm leh nghal thei lawi si a.

(chanchin a ngah phian a, a chanchin hi ka thianpa in ka ziak ve duh a tih avangin tamtak, nuihzatthlak tak tak te a ziah atan ka kheksak a, a ni’n a ziak ve nual a ni.)

I chhiar tur hi khua emaw hnam bik emaw hmuhsitna leh nuihzatna thu a ni lova, Zoram buai lai chanchin kha a hlimawm lam a awm lo lulai em mai a. A hlimawm zawnga thlir tumna a ni. Chutih rualin khatih hunlaia ‘nationalism’ buaipuitu zinga tamtakte pawh kha an thil buaipuiah khan an chiang vek bik lo hle tih a hriat theih mahna!

“Mahni-lo-maha kan dinhmun a that tawh nak laia, tun ataka Zoram Independence lo ngen ve te chu, zawh loh nghawngkawl a hrawk rek zawnga bah ang mai pawh a ni lo, ‘Pialtlepa liluh tum ang a ni’”(Zoram Politic Lumlet Dan, 2nd Edition, p-197) tia Pu A. Thanglura te ho an huk dum dum hnu, March ni hnih 1966 atanga Rambuai (Disturbed Area) a puan kan nih tak pawh khan Ngaizawl khua hian Zoram-in Zalenna a sual tih an lo hre ve lo ni ngei tur a ni. Pu C. Lalpara thuziah Buailai Boruak , Rambuai Lai leh Kei, tih lehkhabu Mizoram Upa Pawl chhuah atang hian rambuai laia Ngaizawl khaw chanchin ilo ngaithla teh ang u.

IN HNEH AWM DER SI LOVAH: Zan khat chu zanriah eikhamah a thim hle tawh tihah khan Champhai Keifang tlang sipai camp kha a alh ta hluah hluah mai a, sipai ho tih kan palh mai a nih an ring a. Khawzawl sipai camp-ah lah chuan silai a ri reng mai bawk si a, chan an kap a nih te an la ring ta mai mai a. An khaw chhehvela an han vahchhuah nak a lai chuan an khaw thenawmte lah chu ramhnuai mi (MNF Volunteer) chaw pein an lo phili buai hle tawh mai si nen, an ni buai thuhla engmah lo hre ve lem lo chuan thil awmzia an han zawt chiang ve ta a. Mizoram-in Independence a sual ani tih an han hriat chuan, an han ring lo laileng khawp a, ‘In hneh awm der mai si lo va, do duh suh u,’ te an tihsan mai mai a.

ENG DENCE PAWH SUAL ANG HMIANG: March ni 15 a lo thlen meuh chuan leh! Ngaizawl khua chu lo hal tur chungchangah an buai hle a. An chhehvel khuate ramri veng turin an hrilh a. An khaw thenawmte lah chuan, ‘Lo hal a sawi theih loh, kan ramin independence kan sual a nih hi, engmah rawn sawi tawh suh u,’ an lo tihsan mai si a. Ngaizawl VCP Pu Ngulhenthanga chuan, “ Eng dence pawh sual ang hmiang, chaw ei loin kan awm thei dawn em ni? Keini chuan independence aiin, hlo thlawh theih loh kan hlau zawk. Ramri chinah meilam sat chhuak vel ila, I hal mai ang u’’ a tih leh an khaw mipui chuan an ngam chiah si lo: A tawp a tawpah chuan nasa taka an inhnial hnuah hal chu an ti thlu ta nge nge a ni.

Ngaizawl khuaah hian India sipai an kal ve fo thin a, mahse sipaiin mipui an hmuh danah ‘politician’ hmel an awm lo nge ni, Mizo theuh mah ni ila, tawng hrang (Paite) an hman vang pawh a ni ang. Tin, an vanneih ve hrim hrim vangte pawh a ni thei bawk ang chu. Ngaizawl khua an han thlen chuan rin aiin an tha viau zel mai a. An khaw roreltute tan pawh a hahdam thlak em em thin a ni.

LAL PAHNIH RAWNGBAWL A NGAI TA SI: Tumkhat chu Ramhnuai lam mi an hotu pakhat a hote hruaiin Ngaizawl a han thleng a. Khua a curfew a, mipui a khawm a. Thu a sawi ta a, “ MNF pawl chauh Mizoram-ah an awm thei a, Party dang reng reng awm phal a ni lo, MNF hi in zawm tur a ni. In zawm duh loh chuan in duhna lam lamah kan dah ang che u” tiin. Mipui chuan, “ Duh ta lo ila, engtin nge min tih ang. Khawiah nge min dah ang?” an ti a. MNF hruaitupa chuan, “A harsa hleinem. Feet 6 a thuk leh feet 3 a zauah a ni mai a lawm. Tunah a duh leh duhlo VOTE kan la ang. MNF zawm duh zawngin in ban dinglam phar rawh u le!” a ti ta mai si a le. “An duh vang pawh ni loin, an hlauh vang zawkin mipui chuan an ban dinglam chu an phar suau mai a ni” tiin an khaw zirtirtu Pu Theua chuan a sawi.

A sawi zel danin, “A khaw pum mai chuan MNF supporter a nih loh theih ta si lova. MNF lam tang an ni zo ta vek mai a ni”. Tichuan, MNF lamin puakphurah an chhawr ta zel a. Tin, India sipai lam pawhin an chhawr bawk si a. A lehlam lehlam chuan hnial ngam a ni bawk si lo. Lal pahnih rawngbawlin an buai tawn ta chhen mai a ni.

TUIBUR CHUANG AN NEI BIK LO: Vawikhat chu Khawzawl Camp O.C. chuan Ngaizawl VCP hnenah tuibur a dil mauh mai a. An VCP chuan, ‘ka han zawng a nge’ a ti a. A kal ta a, a va hmu lem hlei lova. A hmuh loh thu pawh chu a hrilh lem lova. An ngawi liam ta mai a.
An lo kal leh tum chuan O.C. chuan, “Ka tuibur zawntir che kha i hmu ta em?’ tiin a zawt a. VCP chuan eng danga chhang ta lem lo chuan, “A ni tak ka pu, ka han zawng ngial thin a, tuibur chuang a lo awm reng reng hleinem maw le,” a ti theuh mai a. An O.C. pawh chuan tihngaihna hre hek lo. A ngawihsan ve ta mai mai bawk a.

NGAIZAWLAH CURFEW A THEIH VE LOH: Vawikhat leh pawh, Aizawl atangin helicopter-in paratrooper sipai a rawn thlak a. Chung sipai ho chuan Ngaizawl chu an awmchilh ta a. VCP hnenah chuan, “Zan dar 5 atanga zing dar 6 thleng curfew a ni ang, tiin ka pu tlangau tir rawh” an ti a. An VCP chuan, “E ka pu, keini chu curfew ve theih kan ni lo, zan lamah hi kan in kawmkhawmna hun neihchhun a ni a, zu te kan inho duh thin a. Curfew a theih ve loh, Ramhnuai mi in hlau a nih chuan keiman kawtchhuah tinah tlangvalho ka duty tir mai ang, hlau reng reng suh, hetah nangni hoin awm bawksi chuan ramhnuai mi chu an lokal lo reng reng ang” a ti ve tlat mai a. Sipai ho pawh chuan an curfew ta lem hlei lo va.

MOVEMENT PERMIT A HLAWMIN: Vawi khat chu, “Pem hruai tur an awm a, a thei apiang kal tur a ni” tiin tlangau a lo au a. An kal ta hlawm a. Chumi ni chuan Assam Rifles ho Ngaizawlah an lo lut teuh mai a. Tlaia pem hruaiho an lo thlen chuan sipaiho chuan VC Permit an neih leh neih loh an lo zawt zel a. Tuman an nei si lo. An hotupa chuan a dahhran tir zel a. A khungkhawm ta teuh mai a. An VCP hnenah chuan, “Khua atanga kal chhuak tur reng reng VC Permit an keng zel tur a ni tih order pawh i hmu si a. Enga tinge permit i pek loh?” tiin an zawt a. Pu Ngulhena chuan, “A thei apiang kal tur ka ti mai si a, a kal zat tur pawh hre hek lo i le. Chubakah, a hlawmin lehkha pakhatah ka siamsak mai a ni. A mal mala ka pek chuan ka lehkhapuan pawhin a daih dawn lo a ni” tiin a chhang a. Sipai hotupa pawh chuan, “A nih tak chu” tiin a mi mante chu a chhuah leh ta vek mai a ni.

NGAIZAWLAH MNF AN LUT: Vawikhat leh pawh, Ngaizawlah MNF mi 8 an lut a. An zinga pahnih chuan silai an pu a, a dang zawng chuan tiang lian tawk tak am hawl bawk a. VCP hnenah chuan chaw an dil ta a, chi an dil, bel an dil leh a, vaihlozial nen, an kal ta a. Chu thu chu Khawzawl Camp O.C. Second Lieutenant Mukharji-a chuan a lo hria a. Ngaizawl-ah han kalin investigation a han la a. MNF ho lo kal thu sipai camp-a a report loh chhan chu point a hmangin an VC te chu a chhuahchhal ta a. VC te chuan, “Mi 8 lek chu India sorkar pui meuh chuan a er lawng chu kan ti mai a. Tin, chubakah, kan rawn report dawn tih an hriat chuan min vaw nek anga, an tlanbo leh daih si anga, nangnin in rawn man hman dawn chuang si lo” tiin an chhang a. Camp O.C. tihngaihna dang hre lo pheng chuan, “ A nih leh tunhnuah chuan an kal liam hnuah in rawn report mai dawn nia” a ti ngawt mai a ni.

Kum 1968 kum bul lam, Ngaizawl khaw chhehvela khuate an khawm deuh vek tawh hnuah, a hnuhnung berah Ngaizawl khua chu Khawzawl-ah khawm a ni ve ta a ni. Mahse Khawzawl thleng chu in 20 emaw lo liam anni lo ang. A hmaa za nufa khua ni thin kha, in 70 zet chu tiau ral an kai a mahse Burma sawrkarin tiaukamah a rawn hnawhthlak leh avangin Hnahlan-ah te awmhmun an khuar hlen ta. In 60 dawn lai erawh chu Burma lamah bawk an chho leh ta a ni. Kum 1972 a Mizoram U.T. a nih khan in 10 emaw lek chuan an khaw hluiah hian an han inbawk leh ta a ni.

A sei deuh tawh avangin Pu Chawngzuala ziak, ‘Ka Hringnun ZinKawng, 1st Edition‘ phek 23 a mi hian khar tum tawh mai ang aw.

‘Vawikhat pawh ramhnuai lam Parliament Speaker Pu Vanhela leh a hote Ngaizawl khuaah hian zankhat an riak a, chu chu misualin Khawzawl vai sipaite hnenah an lo zuk report a. Pu Vanhela te kal liam leh tawh hnuah Jamadar hovin vai sipai chu an han kal a. Ngaizawl VCP hnenah chuan, “Enga tinge i khuaah Speaker a riak a, i rawn report vat loh, nangmah man i duh em ni, ramhnuai lam sipai an lokal chuan report vat tur kan ti si a.” Jamadar chuan a han ti a. Ngaizawl VCP chuan a en ang he haw a, “E ka pu, sipai an inti leng leng lo, Sipikal a inti tlat a lawm,” a ti ve mauh mai a. Tih ngaihna an hre lo hle awm a sin.’

‘Kan Ram buai chungchangah khan Mizo mipui zawng zawng ngaihdan chu a inang vek thei lo tih hriat a ni. Mahse, Mizoram leh Hnamin Zalenna kan sual a, Pathian min siam leh hnama min din ang ngeinn kan pianpui dikna chanvo chu humhim turin kan bei a ni. M.N.F. rammute khan a takin Zalenna kan sual a; a takin nunna kan hlan a; a takin Zofa mipuite pawhin kan tuar bawk’ (R. Zamawia, Zofate Zinkawngah- Zalenna Mei a Mit Tur a Ni Lo, 2nd Edition, P-944)

Lighter chu ka han talh a, a alh eng pap a, ka cigarette hmawr ah chuan chuktuah in ka tan kai ta a. Ka hmui chuan cigarette chu ka hip kawk a, a khu chu ka pum lamah ka hip thla a. Muangchangin ka hrawk lamah rawn chho leh in, ka ka leh hnar ah te chuan sem darh in a khu chu boruak ah chuan an zam darh chiai chiai a. He thil thlentir tu ka lighter chu hum in ka en ta vang vang a.

He ka lighter hi kuhva dawr te a mi Rs 5 a ka lei a ni. A hmel en in a tlawm na a, tih ang deuh khan a man tlawm mahse ka tan a tangkai zia hi sawiin a siak lo a ni.  A thiltih theih zia ngaihtuah chuan he Rs 5 man hian Cheng Vaibelchhe 5 chuang man pawh a meivap ah a chan tir thei a. A pawi khawih pawi theih zia ngaihtuah chuan ram tha tak tak a tikang thei a, ram leh hnam hmelma ah min siam thei hial a ni.

Amah nen a kan chhuah dun tum hi chuan vawi engemaw zat hi ti alh mah ila, tumkhat ah hian sec 5 aia rei ka chhawr ngailo a, a kan ral tawh (cigarette) man zawng zawng hi chhut ta i la, cheng fe a ni tawh ngei ang. Amah avang hian hmelhriat loh tamtak in min biak phah a “Khawi maw lighter i ak mial em?” Amah avang hian midang ka pur na tur tamtak ah midang tibuai lovin min awmtir thin a ni. A chungah hian lawmthu sawina tur tamtak ka ba in ka hre hial a ni. Mahni chauh a chhuah a, Cigarette ah si a, zuk duh bawk si a, he ka lighter ka ah theihnghilh tum hi chuan, chawbel bul a tamchhawl an tih thin hi hrilhfiah leh chuan ngai miah lovin ka hre fiah kuar kuar thin. Hetiang hun ah te hian ka ngai zual thin.

He ka lighter nen hian kan inzui ngun tawh hle a. Khawi i lo han chhuah vah dawn pawh in ka ah leh ah loh hi ka ngaih pawimawh hmasak ber pawl a ni thin. Ka tan thian tha leh rinawm ber ang mai in khawi ah pawh kal i la, ka ipte lailum luahtu a ni thin. Ka hmuh loh chuan ka zawng ruai ruai a, ka tihtlak palh chuan ka chhar vat a, a insawh pem chuan ka tuai mam a, phun nawi zui lovin ka tan rinawm takin hna a thawk thin a ni. A tello chuan ka kim thei tawh lova, a tello chuan khawi ilo chhuah ka zuam lova, a tel chuan min ti thlamuang a, min ti famkim thin a ni.

Thla khat dawn lai kan lo inzui ve ta reng mai a. A damlai nun chawhnu lam a lo hmang ve tan tawh a. Kan intawn tirh chuan sarang nalh tak hmang a uluk tak a pack diam a ni a. Tunah erawh chuan a chhip lam te chu a kaw huau tawh a, a colour nalh tak, sen hiam mai pawh chu lo chuaiin, a lo dal ve ta viau mai a. A kawm a mawi tak a an lehkha bel te chu ka kut tin hlei tak tak te chuan an khawk filh zo tawh a.  A hlutna thuruk, a tui pawh chuan kian zai an rel san mek a, an kian san zo tep tawh a ni. A tui tlem la neih avang chuan kan la inzui hram hram chauh tawh a ni a. A zawh meuh chuan a hlutna zawng zawng a lo bo tawh ang a, khawi lai bawlhhlawh bawm ah emaw paih in a aia tuai tha in a hmun a rawn luah leh ngei awm sia, sawi thei se chu nise a thik ve viau pawhin a rinawm. Chutih hunah meuh chuan ani, he ka lighter ngei hi hahdam takin engmah hnathawh ngai tawh lovin he khawvel ah hian a tawihral hun a nghak tawh tawh ang a. Hlutna reng reng neilo ang mai in ka hnutchhiah ang, chutih hun ah meuh chuan chuan chatuan atan he ka lighter nen hian kan in mangtha tawh dawn a ni.

Ka kum zat hi ka zep ngailo a (ka document pawimawh zawng zawngah ka Date of Birth diktak ka hmang vek) Tunlai nula leh tlangval la ni mek, kei aia upa leh ka kum rualpui te hi kei aiin an lo naupang ta deuh vek nia (mi zawng zawng ka tihna erawh a nilo). Ka aia kum 4/5/6 vel a piang naupang an ni thei ta daih hi mak ve khawp mai. Keini kan upa tual tual a. Thenkhat an naupang tial tial a. Pian kum inang theuh theuh, pian kum a inthlau telh telh a. Zawnglai (zawnlai) nih vanga kum 18 pel thei ta reng reng lo te.. Kum 20 ral kum tam fe kai tawh hnu pawh a ‘teen’ la ni char char te hi awm ve nia.

Kan naupan lai chuan kum tam kan duh a. Kum 15 – 25 bawr velah chuan kum tlem kan duh leh sia. Kum 70 bawr vel atang chuan kum tam bawk kan thupui leh awm sia.

Footballer kum 35 mi chuan tar nih an hlawh a. Politician kum 45 mi chuan naupang nih a hlawh leh thung si.
Naupang ho chuan ka hming bulah ‘PA or PU’ title min dahsak tawh a. Patling tak tak hovin ‘Mama’ min la ti leh ang nulh nulh a. Teenager ho bulah chuan ‘PUTAR’ kan ni tawh a. Pavalai ho bulah chuan ‘NAUPANG’ kan la ni leh lawi a..

Pian kum hi chu sawn ve ngailo te’ng!

1.Lal ngai lo lal a na, an lal a kha.

= Rethei ngailo retheih a na (mihausa tlachhia hi an chhe duh ve fe nia)

2.Lungpui pawh lungtein a kamki loh chuan a awm thei lo.

= Lungte pawh lungpui a awmloh chuan kamki tur a nei biklo (inmamawh tawn theuh kan nisi a. eg-Mihausa te hi retheite(inhlawhfa) te telloin an awm theilo ang bawkin miretheite pawh mihausate an awmloh chuan inhlawhfakna an nei biklo)

3.Mahni infak leh sakhi ngalah engmah a bet lo.

= Mahni infak leh Sakhi ngalah a ti, vun leh a ruh tlem a bet (Mahni kan infak hi chuan chhete chuan engemaw chu a awm a ni)

4.Se bo hnu a se kawng khar

=hian a dang bo tur a veng ve thei

5.Sial rangin sial rang a hring, sakawlin sakawl a hring, sunhlu kungah thei dang a rah ngai lo, Kawi pawh a kawm a that leh a rah a tha.

=Serfang kungah serthur a maw ni an rah tir (eg- Pastor, Kohhran Upa etc. fa an nih vang ngawt hian an fel ngawt lo a nia)

6. Zawngin a ngumkhak a hmulo a a thiante ngumkhak a nuihzat

=A thiante pawhin an ngumkhak an hmu biklo (mi diklohna kan sawi hian kan diklohna kan hmu tello thin a, midangte kan sawi a te pawh hian an diklohna an hmu bik chuanglo)

Thu pathum vel lek, inkarkik deuh deuh, tawite te in kan sawi mai mai teh ang. Kan ngaihdan a ni hlawm ngut ang e maw chu!

1. ‘Mipa in a nupui ni turin hmeichhia Rs 420 in a lei a’

Isua Krista in kros a min tlan/lei chungchang sawifiah nan he thu hi an hmang ziah. Mahse Class XII Mizo (core) kan zirlaiah kha chuaninneihna a man inhlan hi inleina a nilo. Mipa leh hmeichhia inneihna inremna nemngheh nan a man hi inhlan a ni tiin kan zir thin.

Inlei nita ila, thaibawih, nupui ngamlo tunge awm ang?

2. Tunge zu ngawl vei?

Tamtakin kan pawm duhlo maithei. Mahse zu ngawl vei huang hi ka ngaihdanin kan zauh ang e.
Kan thianpa pakhat chu zu a in thin a, “In lo in i awm thei em?” katia. “Ka duh duh hunah ka nghei thei” a tia. “Anih chuan inlo mai la,a thatna awm silo” ka tia. “In a chakawm em alawm” tiin a in leh zel tho a ni.
Hman deuh kha chuan tlem a patling deuh kha zu ngawlvei ah kan ngai. Tunlai chuan kan thalai te, Pathianni tlai apiang emaw, a aia zing a in thinte hi zu ngawlvei huangah ka khung ta. A chhan chu zu inloh a tha tih hrereng chung a an in tlat chuan chu bak angawlvei an awm dawn a mi? ‘Ti ziah’ te hi ngawlvei kan tih te an nih avangin zu in ziah hi chu anmahniin ‘ngawlvei’ ah inngai lo mahse a sim hma chu a ngawl a vei a ni.

3. Kuhva

Zuk leh hmuam huangah kuhva kan dah hi a pamhmai lua em? Kan zu lova, kan hmuam lova, tobacco content awm silova. Wai Wai te nen hian huang khatah dah ta mai ila, ‘kamram’ ah ngai ve ta zawk ila, a fuh ang em?

# Pa pakhat suitcase lian deuh pahnih khai hi Circus boss hnenah hna dil turin a kal a.

“Eng thil nge i thiam ve a?” an boss chuan a lo zawt a.
Chu pa chuan a suitcase pakhat zawk atang chuan lung lian deuh pakhat hi a rawn phawrhchhuak a. Lung chu vân lamah sâng takin a vâwr a, a rawn tla lehlam chu a lûin a lo dawng chat a.

Circus boss chuan, “A tha e. A nih leh, suitcase pakhat zawkah khan enge i dah ve?” tiin a zawt a.

Ani chuan zâwi sapin, “NACHHÂWKNA” ati a.   
——————————————————————————
# “Nupui man hi engzah chiah nge ni rêng rêng ka pa?” fapa chuan a pa chu a zâwt a.

A pa chuan, “Ka hre chiah lo. Keipaw’n hei tun thlêngin ka la pe tlauh tlauh chu a nia…” a lo ti a. 
——————————————————————————
# Putar kum 85 mi chu nidang ang bawkin a daktawr hmu turin a kal leh a.

Daktawr : Ka pu enge i an? I tha em?

Putar : Ka tha lutuk mah mah. Daktawr, nupui kum 18 mi ka fa pâi mêk ka nei ve a… Ka hlim khawp mai.

Daktawr : A ni maw! Thawnthu pakhat ka hrilh ang che. Thianpa sapêlmi ka nei ve a, nikhat chu sapêl tura a chhuak chu a hmanhmawh luatah a silai aiah nihliap a keng a.

A kal hnu lawk chuan sakeibaknei pakhat hi a hmu a. Ka thianpa chuan a tin vang vanga, kah a han tum chuan nihliap chu a inkap parh zawt a. Sakeibaknei chu a thal tawp a…

Putar : Eng thu lawi lo nge i sawi le? Sakeibaknei chu engti kawng zawng mahin a tlu thei lo hrim hrim. Midangin an lo kahsak a niang.

Daktawr : I ti dik chiah. Nangma chungchangah pawh khan…  (H) 

# Highway-ah chuan motor pakhat hi muangchângin a rawn tlân phei a.

Traffic police pakhat hian chu motor chu a lo ti ding chawt a. “Engvangin nge ding turin min tih?” driver chuan a zawt a.

“He kawngpuiah hian 50kmph ai muanga tlân phal a ni lo. Mahse, nang chu 26kmph in i tlân a ni,” police chuan lehkha ziah mawlh mawlh pah chuan a ti a.

“Mahse, he kawngpui ka rawn luh tantirh khân sign board-ah ’26′ tih a inziak sia lawm…”

“A chhan chu hei hi ‘Interstate 26′ a nih vang a ni. I speed limit lam a kâwk lo,” police chuan a ti a.

Police chuan a motor chhûng a han en chuan, driver bula che miah lova thu hmeichhe pakhat, ramhuai ai pawha hmêl dâng zawk tur chu a va hmu a.

“Ani hi engati nge hetianga a awm?” a han tih chuan, driver chuan heti hian a lo chhâng a :

“Interstate 160 kan thlen a chin, heti char char hian a la awm a ni.”  
. . . . . . . . . . . . . . . . . . . . . . .  . .  . . . . .  .  . . .  . . . . . . . . . .

#Mipa naupang pahnih hi an lo inhnial a…

Naupang 1 : In ina naute kha engvanga tap vak vak thin nge maw a nih le?

Naupang 2 : Nangpawh i ha zawng zawng kha bal se, i sam kha tlakawlh vek bawk se, i ke tha kha zawiin kal tha thei bawk lo la, i tap lo bik dawn em ni?  
. . . . . . . . . . . . . . . . . . . . . . . . . . . . . . . . . . . . . . . . . . . . . . . . . . .
# Vanram kawngkhar bulah chuan pa pathum hi an lo ding a.

Vantirhkoh chuan, “In kawppuite laka in fel/rinawm zia ang zêlin car tha tha in dawng ang,” a lo ti a.

A hmasa ber chu a nupui laka rinawm tak a nih avangin vantirhkohte chuan Ferrari car an lo pe a. A dawt leh chu a nupui feh hlána tleirawl sikul bâng chhaih hrât deuh hi a ni a. Chuvang chuan, vantirhkohte chuan maruti 800 hlui an lo pe a. A pathumna chu Zodin thlêr vela zanlâi lasi pêl hrat tak a lo ni ve bawk nen, vantirhkohte chuan scooter tawng deuh hi an lo pe a.

Nikhat chu scooter dawngtupa chuan Ferrari dawngtupa chu tap tuauvin a va hmu a. Engvanga tap nge a nih, tih a han zawh nâk chuan, ani chuan heti hian a lo chhâng a :

“Tun lawk khân ka nupui chu tawlâilîra a chuang lâi ka hmu a…”    :-O  (H) 

(Ka post khat em mai, hetiang lam bak hi ka ziak thiam ve chuang lo nain)

‘I pian leh murna sawi rawh’ min ti mah ula, ka nu kap karah ka piang a, thingtlanagah ka mur kan ti he haw mai ang. Min dem suh u, dem chi kan ni lo, tahpui chi kan ni. Hawh, mi tahpui hawm hawm teh u.

Put tawrh leh ei tawrh bak thiam leh theih kan la neih loh lai hian, nangni zawngin internet hmanga rawra chhut in lo thiam hman lek lek tawh a. Vaihlo chauh hi zuk tur emaw kan tih laiin, nangni chuan Marijuana thlenga zuk nachangte in lo hre leh hman pek a. Kan ngaisangin nihlawh kan ti lutuk che u ti ila, dawt kan sawi tihna erawh a ni ang.

Iptepui lian hel hawl nen, kawla nichhhuak chhiara kan ta leh hlawhchhuah tak meuh Maian tel kan zakzeh hawn laiin, nangni chuan mi chanvo leh ta tur liau liau in lo paipawn run thei a. Keini’n kan thil neih kan phur a, nangni zawng in thil neihin an phur thung che u a, inawhawm thin ngawt mai.

Keini thingtlanga kamding fanute aia, Muster roll-a thawk fanute keartui a san zawk chhung chuan, pawngsual kan la tawk ve lo turah kan inngai ngawt te hi atthlak hle mah se, kan lawm a la tling thung. Bawkbawn bai, nghathu leh aieng telh Sunday zinga kan la hmeh thei a nih phawt chuan, kan la lawm.

A ni asin, khawpuia chi seh ilo lam tura kan lo chuan kai ve chang ni te hian, “A thing bawn tawp, thing mahse a thaw tal uih lo se” min tih supte hian, kan lo zak ru ve thin lutuk asin. Kan mawl leh kan thin zia pawh kan hai bik lo ve, in hriat ang leh dai hriat ang hi kan la rawn tuipui pha lo mai zawk a ni. Tih tak emah chuan, kan Vawkpui Rangi sawn paina Vawkpa leh a chhiat tak thute hi in hre bik chuang em ni kan ti ve tlat.

Halleluiah Chorus hmanga vun var lem in chan lai hian, nun in ning ru tawh tih hi mawl hle mah ila, kan hre ru ve asin. Hallleluiah Chorus tlan sana, kan hla chuam Thlawi Law Law Chhai Hi A Fair Zawk a ni tih hi min la rawn tawmpui ang tih kan ring tlat asin. Chutih hunah chuan Mengrei Generation leh Pialral Theory ngaisangtute kan lo nuih sawh ve tawh ang che u, na in ti ve ngawt ang le!!

Mahse, hei hi erawh a na kan ti thin. Dam loh nikhuain kan khuaah inentirna a awm ve mai thin lo hi a ni. Kan nun inchhan hman tur kan nih laiin, kan nunna hlu tak kan lo chan fo tawh a, a rilru nat thlak thin ngawtin ka hria. Chhangkhatna (Contraceptive Pill) te hi Vawk hurna a ngaiin, kan vawkte kan lo tulh fo tawh bawk a, hur a hnekin an ching fo tawh bawk. Hetiang kawnga min finchhuahtu leh, min enkawltu erawh kan mamawh ve thin ngawt mai.

Rilru nat thlak tak pakhat chu hei hi a ni. Sazu tur leh di thahna hlo kan hman pawlh nawk thin hi a ni bawk. Sazu tur, di thah nana kan hman chang leh di thahna hlo sazu tur atana kan hman pawlh nawk chang hi chuan, a nghawng a na thin ngiang mai. Di ti rem lem lo hian, kan sazu te hi kan thah phah lek lek zawk fo va. Kan khaw nu fianrial tawngtai tamna ber pawh hetiang lampang case hi a ni nawk ti ila, kan sawi sual tam awm love.

Khawpuia in tu leh fate chu an la vannei bik ngawt mai. Keini thingtlang naupangte chuan infiamna te hi kan han nei tlem khawp a. A fingvar zual deuh te pawh an la pang aw inzial tup tup bang lo va. T.V leh Cell Phone han khal tur nei ve lem lo ta nafam chu, an mit an sawisel ve ngai lem lo thung a, patling thankin thah tawh hi kan lawm a la tling hle thung. Rualawh hi na ve thin hle mahse, awt pha ve tur chuan Tuirial Hydel Project tal kan mang lamah tal kan man phak a ngai rih si a ni.

Ni e, mi fate pawh thla leilung an rah tawh chuan, Zawngtah kung sang thei ang bera lawnin, suangtuahna nen thla lei lung kan chuan ve poh a ni ang chu. Chumi hma chuan, kan thingtlang nihna hian min la delh bet dawn a la ang a. Khawpui pa lunglawm ang hi chil puta kan la thihsan lo te a nih ngai chuan, khawpui lamah rual awt leh zual turin kan la rawnin vawm lut ve thawr mai thei a nia.

Lawng chesual:

Dated 5th December 1664 khan Wales ram hmar lama Menai Strait an tihah chuan lawng pakhat a pil a. Mi 81 an chuang a. An zinga mi pakhat Hugh Williams chiah a dam chhuak a, 5th December 1785 khan helai hmun ah bawk hian lawng dang chesualin a pil leh a. Mi 60 chuang zingah mi pakhat chauh a dam chhuak a. Chupa hming chu Hugh Williams tho zuk ni tlat a mawle. Chumai a nilo, 1860 khan helai hmun ah tho hian mi 25 chuan na lawng chesual in a pil leh hlauh mai a. An zinga mi pakhat chiah a dam chhuak leh a. Chupa hming chu Hugh Williams tho zuk ni a mawle. A mak ve khawp mai. A tak a ni bawk si a.

Electric chair:

1890 August ni 6 khan New York a Auburn Prison ah chuan tunlai a ‘Electric Chair’ an tih, misual tihhlum nan an siam chu an hmang tan a. A thatzia hmun tinah a thang vel chiam a. A tha reng bawk a.

Chu chanchin chu Abyssinia, tuna Ethiopia ni ta a an lal Manelik-a chuan a lo hria a. A ram tih changkan nan leh hmasawnna kawng khat nia ring in America a Electric Chair siamtu Company hnen a tang in Chair man to tak chu pathum a chah ve a. A lo thlen chuan an han hmang chhin dawn a. An ramin electric an lo nei ta hauh lo mai a. Sum tamtak senga an chah thlen a nih si avangin dah chhiat mai mai an phal silo a. An buaipui ngang mai a. A tawp a tawp ah chuan Electric Chair pathum zing a pakhat chu LALTHUTTHLENG ah an hmang daih.

Ziaktu: funny

hairehai

Grammar kan sawi anih pawhin grammar tak tak sawi ila, heti hian, tih vel ringawt nilovin, kan grammar copy na english grammar thlengin chiang takin sawi law law i la, hrechiang lova in ngainep ringawt lovin… Tapchhak zawla in tih hriat ringawt hi a tawk tawhlo tih te hi hrechiang i la. A lo chhuahna english grammar thlengin sawi ho ila mawle. Pu JF-a dan takah, sap pachal angin grammar tehi sawi ho teh ang u.

Kum 2013 ah, “ngaihdan a in anglo” la tih pawh hi tlem chuan kan changkanlohna ti lang tu a ni, (kan pawm duhlo anih pawhin a ni miau sia.). Kan grammar lakna saptawng( lehkhabu hlui ho a an ziah dan), (Ok, Sap tawng ti mai ang a tunlai deuh ve bawka, sentence pakhata bracket pahnih awm hi in hmu tawh ngai em? Grammar takin a dik em? Noun ah hian word 2 a nih pawhin a bul tan nan Capital kan hman thin laiin, “Mizo tawng” tih ah pawh Capital kan hmang chuanglo.), hi kan mi hmasa te khan an lo thiam vak biklo a grammar mumal lo deuh min hnutchhiah tih hi kan pawm duhlo anih pawhin tuilo deuha kan pawm mai loh chuan kan tawn mek a ni tlat sia… Mahni dinhmun pawh hrelova inla changkang leh keini aia changkang vai ho pawh pawng ngaihsanloh ngawt ching tan chuan lem a har anih pawhin kan nihna theihngilh thaka inla chngkang lo hian kan nihna tehi hrechiangin pawm ngam hi a tha.

Chu chu keini mizo, mi changkang bera in ngai, khawvel ngaiha hnam hnuaihnung leh TRIBAL ni si hian kan la theilo anih hi 2013 hnu ah pawh…

Grammar kan sawi a nih ro ro chuan dik takin sawi ho law law i la, “Chuti khati,” Ti mai mai lovin….

IN TIH THIAM LEH IN LAK CHANGKAN RINGAWT PAWH HI A NI BER LO, AIA THIAM ZAWK LEH CHANGKANG ZAWK NUIH TI ZA TU KAN NI TIH HI HRIAT THIAM A HUN VE TAWH HNAM CHANGKANG KAN NIH CHUAN…

ps: Chutin punctuation lam ka ngaihtuah lova sentence construction lam ani, fb ah hian tuman punctuation kan ngaihtuah thlap thlap peihlo

Zahmawh hi i sawi lo hram teh ang u. Entirnan:-

1. Mi meizial zu mai mai ‘I va fawp sei ve’ tih te.

2. Mi ice-cream ei tha hle hle ‘I va liak pherh ve’ tih te.

3. Mi thei lo mai mai lai ‘I hawlhna a va sei ve’ tih talh te.

4. Mi buh den hah lai laia ‘I va sawh rang ve’ tih te.

5. Mi nghapih ei mai mai ‘I va kawm uih ve’ tih te.

6. Mi chawhmeh zuar ‘I va fûn lian ve’ tih talh te.

7. Mi bekang zuar tha hle hle ‘I va nei uih ve’ tih te.

8. Mi puan nuam zuar ‘I va nei nuam ve’ tih te.

9. Mi meihawl zuar lai ‘I va nei dum ve’ tih te.

10. Mi blanket zuar ‘I va nei hmul ve’ tih te.

11. Mi kuhva uih zuar ‘I chep hmasa phawt em ni’ han tih talh te.

12. Mi kuhva zuar tha hle hle lai ‘I chep phawta i thun nge i thun phawta i chep’ han tih hram te.

13. Mi zawngtah zuar ‘I va khai bawr ve’ tih te.

14. Mi kawng kal tha hle hle ‘I va pen rang ve’ tih te.

15. Mi hmunphiah zuar ‘I va nei buk ve’ tih te.

16. Mi alu zuar ‘I va nei tê ve’ tih leh a dangte pawh i sim ang u.

Source

Politics kalsan teh ang.
Nikum December 12 (12/12/12) khan khami tum anga ni, thla leh kum inang kha kum za a kal leh phawt loh chuan a awm rih lovang, an ti a, December 12, 2112 thleng an tihna niawm tak ani.

Kumin (2013 atang 2110 thlengin hetiang date hi a awm dawn rih lo. A chhan chu kum khatah thla 12 chauh a awm. Kumin pawh hian a theih si lova, a teuh ber 11.12.13 hi ani maiin ka hria.

Tichuan 2100 atang chuan tun hma lawk anga kan neih, 10/10/10 (October 10, 2010), 11/11/11 (November 11, 2011 leh 12/12/12 an lo nei leh dawn ani (Kwini ho chuan mual kan liam san tawh hmel)

Hollywood ah lah heiang hming hian film an lo siam hman zel a, la en lo tan hetah hian a click theih.

10.10.10 (Twisted Metal Black game)
11.11.11 (Horror movie)
12.12.12(Horror movie)

That’s all, folks

Social Network a vantlang hmuh theih a dah a ni a, a ngaihnawm dangdai em bawk nen ka rawn re-post a ni e:

1. Puitling Sade Sikul ah Ziaktu lian a nia, tun hma chuan report hi a kar leh ah puan thin a nia, a chhan chu inkhawm kan tam in report pek hman ngaihna kha a awm lo a a chang chuan Puitling Report choh an puang hman tawk thin a.

Kohhran pawn a ruattur dik tak an han ruat ta a lawm le….. Report puan hman loh lai khan enge an tih tih zawk tur khawp khan an hneh zeih zeih khawp mai a. Puitling mai nilo Naupang Sande Sikul thawhlawm zawng zawng, kal zat nen lam a puang hman mai pawh a ni lo….. Report kimchang kha a pe hman vek a, Kar leh Dept hrang hrang a hun hmang tur nen lam a a puang hman pawh pui tak kha a ni tawh….

A ni chuan chu mai chu duhtawklo khan, Inkhawm zat kha hmingziak a tanga % nen lam leh, thawh lawm kan thawh kha mi 1 in a a thawh zat % nen lam an puang hman ta bik bik thin kha a nia, pui tak a ni pui tak…..

Chutah Kohhran in Roa rel sual, nupui pasalte thisilo a then a midang neite chu Tunkum kohhran rawngbawlna ah chuan tello se tih an lo pass…

Vanduaithlak takin a ni kha nupui a lo thlak ve khang lang si, a chawlh a ngai ta, kohhran chuan Missionveng Upa Min Chanchin ngah ve tak Upa Huala chu kohhran thurel han hrilh mai tur chuan an tia….

Upa Huala chuan Hotuten in tih chuan a ni mai a lawm a han tia, a han hrilh ta ngei bawk a…

A ni chuan a lo la zam thiam khawp mai…… Rang zet hian Pawi lo, pawilo, mahse kei ai a tha chu in hmu chuanglo ang a lo ti.

2. Thlalak hi an tui mai mai khawp a, Assembly ah Speaker ho in MLA thar ten
thla an la dawn a, an din dan te leh lak dan tur te I&PR lo pui tur in ruat a nia, II&PR ho khan tunge thu se, tu nge tlar hnihna ah ding ang? tunge a tlar tawp ah ding ang, nikum ah darkar khat dawn kan in rem fel a a zahthlak tih te kha an rel an rel a, a ni a va tel ve…… kah tiang mai mai chu ka kut ah dah vek ru, in lo kal pawh a ngai kher lo ang a ti sam et a.

An han la tur tak tak kha chu Governor, Speaker leh CM te kha an thutna tur ah a hruai thlap a, a bak zawng Minister te kha chu Sir pawh Sir lemlo khan an hming khan a ko zung zung mai a, nang chu tah nang kha tah a ti zung zung a, I&PR Director khan va hrilh ru in Sir te kha ti ve tal la a va ti kha, a ni chuan ring leng lawng in TUN ANG AH LEH ZEL KAN SIR TE CHUAN THLA KAN LA HMAN NANG, Beram ang a khalhkhawm an ngaihlai a nih hi…. Saw RAMHLUNA (Amah Faktute a a memberpui) te pawh saw a a din mai mai saw…..

Minute 5 chhungin a rem fel vek hman a, minute 10 chhung in an zo hman vek.

3. Higher & Technical Director Lal zia an sawi te kha a dik a sin aw…….

Directorate dang ah te hi chuan Jt Director pahnih khat an anei a, Dy Director pali nga vel an nei leh a, Asst Director pali nga vel bawk an nei leh a, Dist 8 ah Dist Officer leh an Asst te nen Gazetted Officer hi 40 bak hi an nei ve lo a….an in ti lal ve mai mai a…

kei chu ka Directorate hnuai a mi chiartello pawh hian College Principal zawng zawng hi Jt Director tlukthiau mi 15 vel ka nei a, Principal pakhat hnuai ah Leturer Gazetted Officer thiau 20 bawr an awm leh a….. Ka Directorate chhut tello pawn ka hnuai ah Gazzetted Officer hi 200 chuang an awm hrim hrim..

kan zing bazar te hi min Sir tu an tam lutuk a chawhmeh pawh hi tlawm kan dil ve hman hlei nem, Eng zat man nge han ti ila tu ten emaw min lo wish hman zel a, Rs 10 a Good Morning tih zel a ngai a a ti.

4. Tuikhuahtlang Kohhran Preaching Station hawn dawn khan Zaipawl neih ve ngei kha a rawt a, a mah kha conductor a ni bawk a, kan zai tak tak na ah khan a Conductor ber khan Camera kha a awrh ta nulh mai a…..

Hlauh ang ngei in min vai zai ta maw tih ah a kut veilam a Solfa vai chung zel in a kut dinglam chuan thla an la ta cher cher mai a nih kha…. Insum hi har tak a ni… a ni lah a uar tawlh tawlh Camera kha a la bih ta deuh deuh a, a click zet zet a, a veilam khan solfa kha a vai uar phian bawk sia…..

Inkhawm ban ah kan chhal luai luai a, a ni lah chuan I kut dinglam in a tih a veilam hriattir loh te hi kristian te tih dantur a nia, in rin a tlem a nih kha, kei ka buai reng reng hlei nem… Kan tlangval lai te chuan Chaw kan bar te hi kan veilam hian kawngka bul a sava rawn fu zeuh pawh kan perh thla nalh nalh thin tikhawp chuan kut dinglam leh veilam hi ka hmang hrang thiam a ti.

5. ?hâl châr lai a ni a, Aizawlah tui harsatzia an sawi luih luih tawh a, a thenawmpa-in, “Pu HL, tui hi in harsa ve viau tho lo maw?” a han ti dek dek a. Pu HL-a: “Harsa teh suh e a! Tunah pawh kan awmpuite’n an inleihbuak chhawk ngat ngat!”

6. Rei-ek khaw daiah kawngsira tui an in dawn a, a thianpa chuan, “Pu HL, hei a in tlak meuh ang maw?” a ti a. Pu HL-a: “Ha ha, leh mai mai thin a, intlak te chu sawi loh, tlemin chawk nu deuh ila, in nuam tawk vel a ni a,”

7. Dy Director a nihlai khan Jeep hring kha a kawl thin a a kawl rei bawk a a hne ngang a niang, Jt Director kha a damlo a a na viau tawh tih ah khan a zuk kan thin a a hawn dawn a piang khan GYPSY hi lo ti fai viau ru zuk ti ziah pek a.

8. I hlawhtlin na thurk minlo hrilh an tia…… Ka naupan lai a tangin Mitek thi thawt thawt khawp in lehkha ka zir a hlawhtlinna chu a awm mai, a ti sam et.

9. Bishop Stephen Rotluanga AR Lammuala ordain a nih dawn khan usher turte kha briefing a rawn neihpui a, “Ka ruahman anga in ti a nih ngat chuan felhlel leh phuailuai taka tih luih ?alh pawh tum ula, in hlawhchham ang”

10. A letter head te kha a pui mai mai a sin, a veilam zawng hi a nihna in a khat thla vek….

Dr HL ………..
Jt Director H&TE
Mizoram in a in tan ve a, a chhuk zel a chhuk zel a

Secretary
Mizoram Badminton Association a ti thla zel a, a tawp lam ah chuan

Secretary
Missionveng Puitling Sande Sikul ……….

a tlar thla duat maw le….

11. An kawmthlang ah sawn a hmingpui Revenue a thawk a awm thin a (tun ah a la awm em chu ka hre tawhlo). Revenue a thawk zawk zawng si kha a lar zawk kha an kawhhmuh leh thin sia…. a ni pawn kei chu ka nilo e in hmuh duh, kawmthlang a ka hmingpui khu Revenue a thawk chu a ni e te hi a ti duh der tawh thin si lo a….

Enge ni???

Kapu, Kan ram/huan teh tur chuan kan rawn lam che a…..

Rang fe hian Vawin chu ka hmanlo, naktuk ah naktuk ah hi a lo ti ziah thin a.

A tuk a an kal leh choh hian a mah a nihloh thu leh a kawmthlangpa a nih zawk thu hrilh pah chuan Miin a in luh dawn in an kawngka lu chunga an hming tar hi en thin ta che u, In hmuh duhpa khan Dr a dah pha ve a mi hi a lo la tihkhum zek zel..

12. Inleng pitar : Reiek (Englova te khua) kal kan duh a, kawng kan hrechiang silova, bo te pawh kan hlau a nia….
Englova : E mai mai. Engahnge bo te in hlauh. Maubawk kawnah khuan chhuk ula, in mi hmuh apiang chu Reiek kal tur vek an ni ang

13. Inneih thlalakah a tel ve a ngai ta si a, kan thianpa a hmehtir dawn a, “Ka camera ang hi India ramah 2 chauh a awm a, pakhat zawk chuan a tibo tawh lehnghal. A tha lutuka hmeh thiam loh a awm thei lo. A fiah loh dawn ai chuan a per lo tawp mai ang.” a ti ve tlat.

14. In nuam leh nuamlo hriatna chu,varanda ah hian han dak chhuak ila,Biakin panga tal hi alang ngei ngei thin a. .ka in ah khian han dak ula. . .Biakin sawm alang thei a.

15. Thil ziah lawk tur a nei a, a indap a, pen a lo pai lo palh hlauh mai a. Ka pen hman min dil dante chu, a dangdai ve khawp asin, “I pen ka lo hmang,” ti tha ve mai mai ta lo chuan, “Aw, Mizorama pen ngah berin pen ka’n pai loh tlat chu, khawi i pen kha ka lo hmang mai.” zu han ti kher a!

16. HL VRS CBM

Dr. C. Biakmawia hi thlalak lam tui hmasa a nih ve tho hi. Tunhma khan inneihna lamah te pawh thla a la nasa a. Pastor-in innei te engemaw a tih lai a, a lo lak hman loh chuan, “Ngawi rawh lawk, ngawi rawh, han tih that tir leh teh ” te a lo ti mai thin a. Still vek an hmang a, hmeh fuh angaih thin viau kha…

HL Malsawma chuan, ” Biakmawia te zawng, Thla la thiam chi an ni lo, an zakzum em mai” a ti! HL a zawng ropui tak a ni…ha ha

17. A hmangaihna faktute Re-union emawni an neih a, Video vel an siam vak khan, HL-a hian Laltluangliana lan ve a phal lo..ha ha

18. India Prime Minister zak hnuai a lut hmasa ber ka nih hi.

19. H.L-a hi Delhi-ah a zin dawn a. A fate chuan thil an chah a. An chah hnem a ti deuh nge ni, “in duhloh zawng sawi ula, in sawi loh zawng ka lo hawn ang”…ha ha

20. Thenzawl conference dawn khan, Ushering lam ti tura sawm an tum khan, lo leng rawh u, VIP treat-in ka lo treat ang che u a ti a, Thenzawl lam organizing commitee te chu a office-ah an va leng ta a. Chawhnu pum an inkawm a. Inleng dang office dawrtur pawh a hnar tir vek a, VIP inleng a nei a tih tir vek..
2004 atang khan ushering lam lehkhabu ka ziak e, a tia . A la zo em maw ni?

21. ka pu thla hi i la ve ngai mi!!!????…. EEEE!!!! I HNAR KHA BANG TIAT IN KA LA MAI TUR NIA..

22. Kha!! Rs 100 hi keng la Zawngtrah zu lei la..kal kawng a mi i tawh a piang te hnenah Zawngtrah hi tui i ti ve em? ti la..tui ti e an tih chuan Rs 10 zel i pe dawn nia…

23. Pu HL-a bawk hian Tuikhuahtlang ho christmas ruai chaw bang nasa lutuk kha “Kumtharah chuan keiman uluk takin ka hisap anga, chawhtawlh khat chiah bang turin in chhum tawh ang” a ti a, chutiang chuan an ti ta a ni awme. A hnuah miin, “Pu sawm, khami kuma in kumthar lawmna ruaih kha chawhtawlh khat chiah chu emni chaw kha bang ta?” an ti a, a ni chuan rang vutin, “An kham lo nasa” a ti a ni awm e.

24. Pu HL a bawk kha an vawk vulh an talh dawnin an buai lai laih a, an nu hnenah ‘ Nu-i lokal te’ a tia hman lo chung chungin an nu a rawn phei ‘vawk hi i kutzungchal khan kawk la I HI ti rawh a ti a, thuawih deuhvin an nu in I HI a tih lai takin thla a lo lak sak a ni awm e

25. Mathematics ah khan ka tui thin a, vawi khat chu OR nen khan ka lo chhang zo vek mai a, ka dik vek a Mark 100ah mark 115 ka hmu a, mahse Mark 89 chauh min pe!!! tunah poh ka answer paper chu ka la kawl thra thlap …en theihin a la om( Hei hi nimin a a sawi lai a ni e)

26. Mithi ina a thlala tur te kha an pui riap riap asin, thlalatu chu a ko a, kongka bul ah a ding a, thlalatu hnenah chuan ring leng lawngin, a tap lai tak saw la rawh a ti heu mai mawle.

27. Traffic police pakhat pawh hian alo man ve rawk mai alawm le, an hau thiam mai mai khawp a, engah nge min man, in pu pu pu leh hi ka thun anih hi, in thawh ang te hi chu thawk ve duh i la, lehkha zir angai nag, arsi te hi belve dawn ta ila tih pahin a ban chu a chul thla thuak a, helamah tuarh, helamah tuarh a ti mai mawle.

28. Dr. chi hnih (Medical leh Academic) khaikhin te kha a pui asin, Anni ho te hi chu pan tuam thiam mai an ni a, an hming bula Dr. dahloh pawh pawina awm lem lo, keini te hi chu lehkha thiam uchuak vanga Dr. kan nia, Dr. dah loh hi crime a ni a ti ve tlat.

Source: facebook. Social Network. Hairehai

Lehkha thiam tak tak zingah hian kutziak chhe fe fe hmuh tur an lo awm ve tho mai. Kum 1872 vela US presidential candidate hial rawn ni thei, Horace Greeley-a, New York Tribune chanchinbu enkawltu pawh kha tum khat chu Illinois-ah thusawi turin an sawm a. Hetiang hian an sawnna chu ziakin a va chhang a:

Mr. MB Castle, Sandwich, Illinois
Pu duh tak,
Febuary ni 3 khian kum 60 ka tling ve dawn ta hial a. Ka kum a tam tain ka taksa tlin bak ka thawk ta mah mah niin ka hria. In mi sawmna zahawm tak hi tihhlawhtlin hram tum ta ila, Sawmna dang erawh ka hnar ngam a ngai tan a ni ber mai. Hnar chin ka neih ngawt si loh chuan ka lo kal thei ngei ang tih pawh ka sawi lawk ngam hauh lo

— Horace Greeley

Ni eng emaw zat hnuah a chhanna a dawng a:

Horace Greeley, New York Tribune
Pu duh tak,
Thusawi tura kan sawmna I pawm tih thu tukin khan kan lo hmu e. I kutziak kha kan hre fuh mai thei lo va. Mahse, ka hre kim ta tho ve. I sawi ang hian a hun tur pawh Febuary ni 3 ni se, lawmman atana i sawi, dollar 60 pawh kan remti thlap e. I rawn sawi ang hian tum dangah pawh sawm lehna hun tur kan neih ngei che ka ring.

Zah takin,
M.B Castle.

Tlawng track I lo sawm ang…

Kalna tur dang i hriat loh chuan
Kal lo mai rawh
Awm mai mai rawh

Lunglei.. leh Buarpui ah te
Silpauling an… lo zar ang

Kumthar lawm nan fiamthu tlem. A then hi chu Facebook a mi ka copy.

1. Pathian thu kha a sawi ve a. “Tirhkoh Paula’n, ‘Kei atan zawng nun hi Krista a ni’ an tih fiamthu ang deuh khan” te a ti vel.

2. He pa tho hian — Khawvel eng in ni e, tih kha a chang thlan ve a. Bible a chhiar a. “Tlang chhipa khaw awm chu thuhruk theih a ni lo” tih lai kha. Sawi zau vak ngaihna a hre si lova. Tlang chhip a khaw awm hi thuhruk a har em em a, thuhruk pawh an tum ngai lo tlangpui a ni, te a ti vel. Thlarau a chawm awmlo tiah tiah.

3. Sande Sikul exam ka a chhang ah khan — Mipui 5000 kha Isua khan engin nge a hrai kha? Naupang: A ngawi vung vung a, “Sazu tur in.”

4. Bangalore a vawi khat kalna a nia. A bo a, Police Station ah a va in report a. Khawi lai ah nge i awm reng reng a an tia. I don’t know, I’m a wanderer a ti vel. (True Story)

5.

No. 5 hi chu a copy hman tawh lo a niang